ருத்ரதாண்டவம்

வாகனங்களின் நெரிசலில்
வழிகேட்டு ஊர்ந்தபடி
ஒரு தெருவில்
சவ ஊர்வலம்
மறு தெருவில்
சிவ  ஊர்வலம்

உறவுகள் அழுது  திரும்பிய
ஊரடங்கி ௨றங்கிய
பின்னிரவின் ஜாமத்தில்
நாடகம் முடிந்த களிப்பில்
வேடம் கலைத்து
இருவரும் இணைந்து
ஆனந்தத்தில்
ஆடிக்கொண்டிருக்கக் கூடுமொரு
ருத்ரதாண்டவம்
எரிந்து முடிந்து
கனன்று கொண்டிருக்கும்
கொள்ளிக்கட்டைகளின்
இளஞ்சிவப்புக்
கங்குகளின் வெளிச்சத்தில். 

-நன்றி திண்ணை இணைய இதழ்  

  

மழை விதைத்தவை

இரவு பெய்த மழை 

சாலையில் குழிகளை 

துளி ஏருகளால்

உழுது சேறாக்கி

ஒவ்வொன்றிலும் 

விதைத்துச் 

சென்றிருக்கிறது 

ஒரு நிலவையும் 

சில நட்சத்திரங்களையும்.  

ஒன்றாதல்

பெய்யும் மழைக்கஞ்சி
பயணிகள் நிழற்குடைக்குள்
ஒடுங்கி
ஒன்றாயிருக்கிறார்கள்
ஒரு செம்மறியாடும்
சில மனிதர்களும்.   

புரிதல்2

உழைத்த களைப்போ
உறவுகளின் மீதான சலிப்போ
தூங்கித் தோள்சரியும்
சகபயணி
அவராய் நானும்
நானாய் அவரும்
இருந்திருக்கவோ
இருக்கவோ கூடும்.
   

கங்காரு குப்பைத் தொட்டியும் உங்கள் குழந்தைகளும்

சிரிக்கும் விழிகளுடனும்

மலர்ந்த இதழ்களுடனும்

அணைக்க அழைக்கும்

விரிந்த கரங்களுடனும்

பொதுஇடங்களில் நிற்பவைகளின்

இதழ்களுக்குள் துப்பிவிட்டும்

நெஞ்சுக்குள் குப்பைகளை எறிந்துவிட்டும் கடந்துசெல்லும்

உங்களை

கவனித்துக்கொண்டுதான்

உடன் வருகிறார்கள்

விலங்குகளையும் பொம்மைகளையும்

உயிராய் நேசிக்கும்

உங்கள் குழந்தைகள்.

-நன்றி திண்ணை இணைய இதழ்  

       

நகரியல்பு

எத்தனை  முறை

சுத்தப்படுத்தினாலும்

குப்பையகிவிடுகிறது

மாநகரில் சாலையும்

மனதும்.  

பரிபாஷை.

எத்தனைமுறை கேட்டாலும்

புரிவதேயில்லை

இரயிலுக்கும் தண்டவாளத்துக்குமான

பாஷை.

உயிர்த்தெழுவேன்

புதைதல் விதியென்றிறை புதைத்தினும்
புவிமுளைத் தேகுமொரு விதையாய்
பொறுத்தைம் புலன்கூப்பித் துளிர்த்தெழுவேன்
உறவே நகைத்த லொழி.                      

தொலைதூரத் தொடுவானத்துள் தொலைந்தவை

பார்த்துக்கொண்டிருந்தபோதே
தொலைதூரத்
தொடுவானத்துள்
தொலைந்ததொரு
பறவையும் -என்
பார்வையும்.